|
E ALLORA BEVO
|
'E BBALICE
|
Dint'a butteglia
n'atu rito 'e vino
è rimasto...
embe che fa
m''o guardo?
M''o tengo mente
e dico:"me l'astipo
e dimane m''o bevo?"
Dimane nun esiste.
E 'o juorno primma,
siccome se n'è ghiuto,
manco esiste.
Esiste sulamente
stu mumento
e chistu rito 'e vino int'a butteglia.
E che faccio,
m''o pperdo?
Che ne parlammo a ffà!
Si m''o perdesse,
manc'a butteglia me perdunarria.
E allora bevo...
e chistu surzo 'e vino
vence 'a partita
cu l'eternità!
|
Sto facenn' 'e bbalice.
Me so' miso
a scarta' carte, lettere,ritratti,
tutt' 'e cummedie ca non aggio scritto,
ttutt' 'e ccose bbone ca nun aggio fatto:
ccà stann' 'e fessarie, cca stann' 'e fatte.
Ma che me porto,
che m'aggia purtà ?
Quanne se parte
pe' stu viaggio luongo
ca nun saje si accummencia o si é fernuto,
cumme può di ' .
" Me porto appriess' 'e fatte" ,
o pure : " Mo me porto 'e fessarie " ?
J' me nce songo miso c''o pensiero
e aggio ditto : " Mo faccio a capa mia :
sa' ch'aggia fa ? Me porto appriess' 'e fatte
e lascio 'nterra tutt' 'e fessarie.
|
|
|
Bene mio e core mio
|
'E mmargarite (1926)
|
Se tiene 'o desiderio 'e 'na canzone...
sa' che vuò fà?...
Càntale 'e stienne a voce quanno ammore
te fà cantà!...
Si sto durmenno, me sceto
e nun trovo arricietto...
Quanno me songo scetato,
me votto d' 'o lietto!...
Che staje miezz' 'o mare?
- me mengo! -
Che staje 'mparaviso?
- nce vengo!... -
Senza scala si voglio... nce saglio!
pecchè saglio, penzanno... si voglio!
Miezz' 'e nuvole 'a strata m' 'a sceglio...
Me sbaglio, me mbroglio,
ma saglio e te piglio!
Sott' 'a l'acqua, sott' 'o viento,
sott' 'o nuce e Beneviento,
pe' cantà 'nzieme cu te:
"Bene mio e core mio!"...
pe' cantà 'nzieme cu te!...
|
Na margarita 'o nnammurato 'a coglie
e a' sfronna... Si, ma no cumme facc'j'....
Me faccio 'o cunto, conto tutt' 'e ffoglie
e so' sicuro ca me dice: "Si!"
E tutt' 'e juorne, faccio 'o sulitario,
ne saccio tante, a modo mio, gnorsì.
Si nun me torna, si vene cuntrario,
j'mbroglio 'c ccarte e' o faccio dì ca sì.
Si 'o sulitario 'o faccio senza mbroglie,
che dice tu? Putesse riuscì?
E si 'a sfrunnasse senza cuntà 'e ffoglie,
faie tu c' 'a margarita dice: "Si?"
|
|
|
'O rraù (1947)
|
Fantasia (1956)
|
'O rraù ca me piace a me
m' 'o ffaceva sulo mammà.
A che m'aggio spusato a te,
ne parlammo pè ne parlà.
Io nun songo difficultuso;
ma luvàmmel' 'a miezo st'uso.
Si, va buono: cumme vuò tu.
Mò ce avéssem' appiccecà?
Tu che dice? Chest'è rraù?
E io m' 'o mmagno pè m' 'o mangià...
M' 'a faje dicere na parola?
Chesta è carne c' 'a pummarola.
|
Pigliammoce sta vita cumme vene,
llassammo for' 'a porta 'a pucundria,
mparammece a campà c' 'a fantasia:
nce sta cosa cchiù bella pè campà?
'A fantasia se sceta ogne matina
comme si fosse prencepe rignante,
affonna 'e mane aperte int' 'e brillante
e nun s' 'e ppiglia: che s' 'e ppiglia a ffa?
E che curredo tene! Nu mantello
ca luce cchiù d' 'o sole e nun è d'oro;
quanno se mena ncuollo stu tesoro,
abbaglia 'a vista: nun se può guardà.
Pò tene nu relogio cumpiacente,
cu sissanta minute d'allegria,
mmiez' 'o quarante liegge: FANTASIA
e fa tà-tì, tà-tì, nun fa tì-tà...
|
|
|
Quanno parlo cu te (1966)
|
Penziere mieje... (1948)
|
A parlà c' 'a luna e ' sole
songo buone tutte quante:
nnanz' 'a luna tu te ncante
e te miette a ragiunà.
Spicialmente 'a luna chiena
me risponne a tuono, a ssisco,
e me dice: "Te capisco,
saccio che ne' vuluto dì".
Nnanze a te pure me ncanto,
tu però, quanno me siente,
nun capisce 'o riesto 'e niente!
Ma sta luna, fusse tu?
|
Penziere mieje, levàteve sti panne,
stracciàtev' 'a cammisa, e ascite annuro.
Si nun tenite n'abito sicuro,
tanta vestite che n'avit' 'a fa?
Menàteve spugliate mmiez' 'a via,
e si facite folla, cammenate.
Si sentite strillà, nun ve fermate:
nu penziero spugliato 'a folla fa.
Currite ncopp' 'a cimma 'e na muntagna,
e quanno 'e piede se sò cunzumate:
un'ànema e curaggio, e ve menate...
nzerranno ll'uocchie, primm' 'e ve menà!
Ca ve trovano annuro? Nun fa niente.
Ce sta sempre nu tizio canasciuto,
ca nun 'o ddice... ca rimmane muto...
e ca ve veste, primm' 'e v'atterrà.
|
|
|
Roma (1970)
|
A... B... C... D... (1930)
|
L'orario e 'a strada pè truvà pace e cammenà cuieto,
pè fà capì a te stesso cumm'è 'o penziero ca tu tiene
ncapa,
si sàpe 'e sale si ha pigliato 'e fummo si vale 'a pena
invece
d' 'o penzà, a Roma chesta strada ce sta sempe.
'A truove sempe 'a strada 'a piazza 'o vico:
se trova all'alba 'e juorno 'e notte, sempre.
Attuorno siente 'a musica d' 'e vvoce,
pè llaria 'a luce e ll'ombra d' 'e pparole:
parole grosse e chelli piccerelle.
Truove 'e muntagne 'o verde d' 'a campagna
'e ccase d'oro ca se fanno rosse pò 'e ramma,
cumm'attone e doppo 'agiento...
Te truove overamente ncopp' 'o munno
cuieto e sulo stanno ncumpagnia
e stienne 'o passo nzieme c' 'o penziero.
|
Nu fugliett' 'e quaderno aggiu truvato
ncopp' a nu marciapiede. Pè capì
che steva scritto me l'aggiu pigliato.
Lettere grosse e storte: A... B... C... D...
Mille quaderne, mille guagliuncielle:
scriven' eguale, 'o stesso, a chell'età.
Però quanno se fanno grussicielle,
stu carattere eguale chi t' 'o dà?
Nun capisco, se guastano p' 'a via,
nun trovano cchiù pace... ma pecché?
Stùriano pè cagnà calligrafia
e ognuno scrive cumme vò parè.
Ce hanno criato 'e na manera sola,
chi cagne è pè superbia, t'ho dich' j'...
'E guaglincielle, quanno vann'a scola,
scriveno tutte eguale: A... B... C... D...
|
|
|
Te sistieme
|
Nu soldo dint' 'a sacca nn' 'o truvavo:
ll'amice, cene, femmene, 'o triato...
'A lira overamente nn' 'a curavo,
e quase sempe stevo disperato.
Dicev' 'a ggente: « Sulo na mugliera
te pò cagnà sta capa p' 'a galera.
Te nzure, te sistieme nsanta pace...
siente na vota nu cunsiglio mio! »
Embè, mò nun me pozzo fà capace,
embè, v' 'o giuro quanto è certio Dio:
j' nun sò stato maie tanto nguaiato
comme a mò ca me songo sistimato!
|
|
|
|
|
